2003-12-22
Weihnachts Schpezial
Erste Folge: Weihnachten 82
I
m zwaredochtzga Johr hots, wonn i so aufdenk, schoan wolten fruah gschnibn ghobt. Es wor eigentle a Londschoft wia ausn Bildabiachln. Dementsprechend wor kloraweise de Stimmung aufn halign Obnd. I schoan in da Friah auf, und mitn domolign Freind von meina Schwesta in de Stodt Christbam kafn. Zerst hamma uns natirle a bissl a Fruahstick zuar Brust gnommen und dazua a poormol von an Flaschln Biea obagebissn. Wias nocha auf a Zwa zua gongen is, homma uns beim Christbamtandla noch a kraupate Silbatonn gekaft und zur Stärkung noch an Puntsch beim Raina getrunkn. De Dirndlen daham wornt wolten zfriedn mitn Bam, a bissale weniga mit uns zwa. Oba mia seima a poor Minutn späta sofurt ausn Schneida gwesn, wia da Vota vom Gschäft ham khemmen is.
Wos glabs, wos dea fia an Murdsdrum Rausch ghobt hot. Und de Muatta hotn natirle sofurt a Theata gmocht, erstns zwecksn Saufn und zweitens zwecks da Frau Schernthaner, de wos zua domolign Zeit sei Kassierarin wor. Eh a krautschiache Wabn, oba fia an onständign Stunk zua de Weihnachtn wor se long guat. Nojo, da Vota is auf olle Fälle a bissale niedaliegn gongen und mei Schwoga und i hama mit de Weibaleit in Christbam aufgeputzt. De Muatta wor wohl a bissale deschparat, oba mia homa uns davon gor nit de Stimmung zsommhaun lossn. Wia nocha uma sexe de Vawondschoft ongruckt is, olln voron de Erbtant, wor eigentle eh schoan wieda olls paletti.
Und wia nocha de Muatta de Rein mitn Schweinsbrotn und de Schissl mit de dompfendn Erdepfl aufgetrogn hot, is an schean halign Obnd nix mea in Weg gstondn. Lei bold amol homma nocha ongfongen de Packlen aufmochn und de Muatta hot wia jeds Johr drauf bestondn, doss ma olle mitanonda Stille Nocht, halige Nocht singen. Mir Letha wornt eh nit goraso schwar zan ibaredn. Wal mia worma eh schoan wolten lustig, und sozusogn in weihnochtlicha Stimmung. Und es beste wor jo, doss mei domoliga Schwoga mia a Flaschl Tschek Deniels und i eam a Flaschl Wodka gschenkt hot. Spontan wohlgemirkt, nix ausgredet. Nojo, und nocha hom a Patie fuchzene obe ongfongen. Wal des hot uns mea getaugt ols wia es Stubna Toggangspiel, es Heazln. Mia homa so zan driabastran de zwa Flaschln Hochgeistigs vanichtet und homa gor nit so schnell schaugn gekinnt, hot de Muatta schoan zua Mittanochtsmettn gmohnt.
Bei uns is de eh schoan um elfe, wal mia seima jo olls Luthrische. No guat, da Votta is wieda liegn gongen und mia Buamen seima mit da Muatta und da Schwesta in de Kirchn in Stodtpark. De Hasn wornt gonz begeistat von da Wintalondschoft und hamb sich bis zua Kirchn kaum eindafongen. Wia ma noaha entle in da Kirchn worn, und Gott sei Donk an Sitzplotz gkriagt homb, seima mei Schwoga und i lei bold amol eingschlofn. De Schwesta hot gsogt mia homma fest gschnorcht und de Muatta hots sich glei weggsetzt von uns, wal se sich so gschomt hot. Zan halign Obndmohl hot uns noha de Schwesta prächtig aufdaweckt.
Also mia ausse zan Altar, und wias da Teifl hobn will, prakts mi genau iba de Altarstufn aufe, da längs noch, vurn Pforra seine Fiaß ume. Freid hot ea kane ghobt, oba in Messwein hot ea uns derwegn gebn. Am meisten geniert hot se de Muatta, dabei hot sie jo gor nix getrunkn ghobt. Also nix wia ausse ausn Templ. Und bledaweis siegh de Muatta genau noch, wia i in frischn Schnee „Fut“ einebrunz. Noh mea hots nit gebraucht. Sie fuxteiflswild ham. Mia natirle auf an Ziahga in de Stodt. Wia ma mia nocha uma fünfe in da Fruah am Christtog hamkemmen seint, is de Muatta ollewal noch ban Kuchltisch gsessn und hot geplärrt.
Nextes Johr: Weihnachten 73: Wia uns de Muatta auf und davon gongen is
In olle scheane Weihnachtn
Da Gerbagassla
