2004-09-24
so wors amol
wia ma noch jung worn
Ma ihr seits so undonkbor. vül homa jo nit ghobt, oba mit dem wos ma ghobt hom sema zfriedn gwesn. Die leit hom wieda onghebt zum strickn, de wölda wornt von die tschurtschln und von die äst lar .
Unta die obstbam is ka noch so klanes apfale glegn, weil die leit hom noch sölba marmelade gmocht. Und zum Krampus hots Kloaznbian gebn. Mit da Muatta hot man nix redn kennan, weil sie hot jo die neichn Sockn strickn miassn fir die Weihnachtn.
Und wenn da Nochbor gschlachtigt hot homa a Bluatwurschtsuppn gessn und wenn ma a Glick ghobt hot is a Bluatwurscht aufgeplatzt noacha wors nit lei des blosse Wossa..
Nocha wia olle schon a bissale wos ghobt hom sen die eisnbohna auf Reschie noch Tavis eine gfohrn und hom a Floschn Wein aussa gschmugglt. Und vielleicht a a Puppn firs Dirndle dabei gwesn, oda Konservn mit an Fisch. Oba nocha is schon da Neid aufkumman. Es hot jo kana kan wos vagunnt. Lei wenn’s zum Obstpressn wor, hot man gsegn wer wos ghobt hot. Wenn ana on da Reih wor und mir Kinda hom vom frisch gepresstn Opflsoft trinken derfen, hot ma gwusst, der Baua is nit neidig.
Noacha is schon gaxt die Motorisierung ongfongan, weil daweil sen jo olle lei mit da Wochkortn zur Orbeit gfohrn. A Puch 250 TF hots sein miassn, wissts es eh die gölbe oda wenigstns a Moped. Heit sogt man dazua „Postlagas“, zerscht wornt se olivgrean hom zwa Gäng ghobt und an Lenka wia a Hirschgweih, de Buam hom sich den oba glei obgschnittn. Gaxt ana hot noch a richtiges motorradl ausm Kriag ghobt a DKW, de is oba lei a Zwatakta gwesn. De Bessaren hom oba a Viertakta ghobt a Zündap oda wenigstns a BMW. Und de wos gonz guat worn hom a englische Maschin ghobt A AJS oda a BSA Matchless oda a Norton, ma de hom gholdat. Bei uns wor nix mehr mit ana TF weil de sen jo mit Gemisch gfohrn mit dem hot man jo nit amol a Feiazeig fülln kennen. Oba zum Maschin putzn is es guat gongan de hot noacha lei so geglänzt.
Daweil sen schon die Lebenmittlmarkn obgschofft worn. In die Gschäfta hot mon schon olls wieda kriagt. I wer niea vagessn bei unsan Greissla is nebn da Speckseitn a Fohrradlmontl ghengt In da Schul hom die Kinda schon gaxt amol a Füllfeda ghobt. Lei i nit weil i hob solche Probleme mitm Dividiern ghobt: Mei Vota hot gmant, wenn i zehn Divisionen richtig damoch, kriag i a ane. I hob mi so ongstrengt oba ane wor holt imma folsch. Bis mei Omi sich meina dabormt hot und hot ma ane gekaft. I waß noch genau 13 Schilling hot se gekostet. Und schiach wor sie, so hellgrau gsprenklt. Oba man hot mit ihr an gonzn Aufsotz schreiben kennan ohne die Feda ins Tintnfassl zum eintauchn. De Tintn wor sowos von schiach, so violett, oba mir sen draufkummen, wenn man a Wossa dazua eine tuat, wert se gonz schen höllblau. Oba die Lehra wornt so gemein, wenn ana mit so ana Tintn gschriebn hot, hom se den „Tintnvadinna „ bei die Ohrn gezogn, weil de Tintn hot jo da Stoot gekaft und des tuat man nit. Amol hot wieda ana mit so ana höllblauen Tintn die Hausaufgob gmocht und da Lehra hot ihn sofurt bei die Ohrn gezogn. Da Schüla hot glei zum plerrn ongfongan und hot a wos von seim Vota gsogt. Der is noacha in die Schul kemmen, weil er hot dem Bua aus sein Tintnfassl die Füllfeda fülln lossn. Da Lehra hot sich noacha beim Buam entschuldigt, indem er ihm dauand ansa gebn hot. Weil jo da Vota wor a gonz hohes Viech in seina Fabrik. I was nit wos aus dem Buam gworn is.
Mia Buaman hom olle so a brave Frisur ghobt, oba a por Bersch hots gebn, de hom schon a Hintafrisur ghobt. Eh klor mir homm olle so a fetzige Frisur hom wolln, olls homa probiert, Niveakrem homa uns in die Hoor gschmiert oda a Schweinsfettn, oba des het neamt wissen terfn, weil a Schweinsfetttn wor noch imma wos söltenes und mit an Lebnsmittl spült man nit.
Schon hom anige von de Buam a Toschngöld ghobt. Es wor jo nit vül, oba se hom sich wos kafn kennen; 10 Schlazkugalan hompt an Schilling gekostet oda 10 Stollwerk hom a an Schiling gekostet, a Stopppl fir die Bremsn beim Fohrradl hot zwa Schilling gekostet. Des wornt olles Sochn, de hot ma unbedingt hobn miassn genau so wia an Stopplrevolva. Ma hot jo eh kane Stoppln mer ghobt oba an Revolva hot ma hobn miassn noacha worns de Wossaspritzpistoln. I hob des olls nit ghobt, oba ans hob i ghobt, an Drochn der is sogor gflogn.
Und noacha wia i schon Radl fohrn hob kennan, hob i ma von mein Toschngöld, auf dem mei Muatta ghuckt is wia a klunzige Henn, a gebrauchtes Radl gekaft. Ma, wor der Grotn beinonda. Hintn und vurn wornt ane Ochta drin, Liacht hots sowieso kans ghobt oba gfohrn is es. Und mir hots ghert. Domols homa mir im 2. Stock gwohnt und i hob imma dos radl iba die Stiagn auffetrogn miassn, weil es könnt jo gstohln wern. Wia mi amol da Dorfschendarm dawischt hot, weil i im Finstarn gfohrn bin, hob i zwa Schilling Strof zohln miassn. Und schon wor dos Toschngöld fir die Wochn wieda weg. Des hot meina Omi so lad geton, dos sie gsogt hot, hiaz kummt eh bold Weihnachtn, wer ma segn wos des Christkindl bringen wert. Auf a Radlliacht hob i domols jo nia gedocht. Weil mir hom noch imma lei praktische Sochn gschenkt kriagt, Sockn, Pullova
Nur amol hob i a gonze Schochtl TOKO Schiwox kriagt und amol sogor ane Stohlkantn fir die Schi. Dabei wor i ka guata Schifohra.
Oba die Om, von der i da Herzibua wor, hot ma zum Christkindl glott a nigl nogl neiche Beleichtung fir mei Radl gschenkt. Und noch ane vom Bosch, ma i warat glott geplatzt vur Stolz. Weil so etwos hot neamt nit ghobt
Sovül aus meina Arinnarung zum Thema: Denkts amol noch, wos homa mir nochm Kriag ghobt?